Achégase a eclipse de sol de 2026, que terá lugar o 12 de agosto. Esta eclipse será total en moitos lugares de España polo que é unha grande oportunidade para observar este fenómeno. E non nos levemos a engano, a experiencia dunha eclipse total é moito menos habitual, diferente e moi superior, á dunha parcial. Neste caso, a diferenza entre un 99,99% y un 100% é abismal.

Podes consultar onde haberá totalidade e canto durará en distintos sitios web, por exemplo en https://visualizadores.ign.es/eclipses/2026 (do Instituto Geográfico Nacional), en https://www.turismo.gal/que-facer/eclipse#mapa_interactivo (só Galicia) ou en http://xjubier.free.fr/en/site_pages/solar_eclipses/TSE_2026_GoogleMapFull.html (en inglés).

O máis importante durante o fenómeno é a seguridade dos teus ollos. Mirar ao sol sen protección pode causar unha lesión ocular permanente. Non é ningunha broma.

Por iso é imprescindible empregar protección adecuada ou medios indirectos. Para a observación directa só se deben empregar filtros homologados ISO 12312-2 con marcado CE e de marcas de confianza, ningún método caseiro é válido. Non arrisques os teus ollos con métodos caseiros, os anteollos con filtro homolgado non son caros (un ou dous euros) e poden compartirse entre varias persoas, de feito é recomedable facelo así. Porque incluso con eles non se debe mirar continuamente ao sol, como moito en períodos de 30 segundos ben espazados. Compartilos por quendas é boa idea. Por outra banda, os máis cativos é mellor que non empreguen estes anteollos con filtro, poden desfrutar igual da eclipse por medios indirectos como os que se describen a continuación.

MÉTODOS INDIRECTOS PARA OBSERVAR AS ECLIPSES

1. Proxección indirecta a través dun telescopio. Consiste en engadir unha cartolina no portaocular para que se proxecte a imaxe nunha pantalla branca. O inconveniente é que require unha preparación previa para axustar ben o enfoque da proxección. Non é moi recomendable pois temos que asegurarnos de que ningún rapaz teña acceso ao telescopio sen supervisión. Podería, por curiosidade, tentar mirar directamente polo ocular e lembremos que en proxección non hai fitro solar que o protexa. Podería sufrir danos irreparábeis no ollo en fraccións de segundo. Para evitar isto pódese encerrar o espacio entre o ocular e a pantalla cunha caixa opaca dalgún tipo, e cambiar a pantalla por papel translúcido, por exemplo papel de forno.
2. Proxección indirecta a través de obxectos comúns con buratos. Pódese proxectar o Sol nunha parede ou no chan empregando obxectos simples como unha espumadeira ou un escoadoiro. Cada burato proxectará a eclipse, polo que veremos centos de soles.
3. Proxección indirecta cunha cámara escura ou proxector estenopeico. É un dispositivo moi sinxelo de fabricar na casa cunha caixa de cartón. Aquí tes instrucións para facer un.

PARA SABER MÁIS

• Libro en descarga gratuita sobre o tren de eclipses, publicado polo Instituto Geográfico Nacional.
• ¿Por qué 3 grandes eclipses de Sol seguidos en España? Repaso histórico aos métodos de predicción de eclipses, na web do noso socio Juan Carlos.