Desde 2021 o observatorio dispón dun reloxo de sol fabricado cun bloque de granito instalado na fachada sur. Baixo el atoparemos unha placa que explica, cun exemplo, como utilizar o reloxo para ler a data aproximada e a hora do día.

O exemplo é o seguinte:

Data aproximada

Sabendo que estamos en verán e observando que o vértice da sombra se atopa entre as liñas de declinación correspondentes ao 22 de agosto e ao 22 de setembro (equinoccio de outono), máis ben próximo á do 22 de agosto, determinamos aproximadamente que a data corresponde ao 26 de agosto.

Hora

En canto á hora, a sombra do estilo indícanos as 4 h 25 min da tarde (hora solar verdadeira), xa que o vértice está entre as liñas IV e V, á dereita das XII (a esquerda a mañá, á dereita a tarde).

Para conseguir a hora oficial teremos que facer dúas correccions:

- Sumar 1 h 34 min no horario de inverno ou  2 h 34 min en horario de verán (1 h por franxa horaria, 34 min por desviación en lonxitude respecto do meridiano central da franxa horaria e 1 h pola hora adicional en verán)

- Utilizar a táboa (interpolando) para sumar ou restar minutos segundo a data. Porque para un reloxo mecánico todos os días teñen 24 horas, pero a Terra na súa órbita arredor do Sol non vai sempre á mesma velocidade e en consecuencia o día solar verdadeiro non é constante. Esta diferenza recóllese na ecuación de tempo.

Hora oficial = 4 h 25 min + 2 h 34 min + 1 min = 7 h da tarde.